البرهان حالياً قاعد يشرب في قهوة نص كباية بدون سكر و بدون دواء في قصر فيرديناندو مارتيني الإيطالي بأسمرا و القهوة في أسمرا عندها طعم تاني و بتاخدك لعوالم اخرى لكن برضو ما ذي قهوتنا السودانية .
احنا قهوتنا برااااااها ، انا شربت القهوة في ركن بجوار المستشفى الإيطالي في مدينة تسني بارتيريا و شربتها في ابيسينيا خلف شارع بولي باثيوبيا و شربتها في دار العقيلات بالأقصر في مصر و شربتها تحت جبال الفاو بالقضارف و داخل كراكير جبال النوبة و شربتها في خور ابو حبل و شربتها تحت اشجار المنقة في منطقة الترتر تحت ذخات المطر بجنوب كردفان و شربتها عند الحجة ( كتي ) في منطقة هيبان و شربتها في قيسان بالنيل الازرق و شربتها في حي الجمهورية في مدينة الجنينة غرب دارفور و شربتها تحت اشجار منطقة تلس بجنوب دارفور و شربتها في المتمة شندي و المتمة اثيوبيا و شربتها جنب ترعة في ٢٤ القرشي بالجزيرة و في ابو جابرة بالدويم و في الف منطقة و وادي و خور في بلدنا من شرقها لي غربها و من شمالها لي جنوبها ، لكن ذي قهوة ( سوريبا ) في حي الكارا في كسلا ما لقيت .
العايز اقولو إنو سودانا ده من غير التنوع الفيهو ده ما كان ح يكون عندو طعم و نكهة و قواتنا المسلحة من غير التنوع الفيها ده ما كان حققت انتصارات عبر تاريخها الطويل ، و الما داوس مع احفاد السطان عجبنا و السطان على دينار و عمارة دنقس فما ح يعرف قدر الرجال و معنى الوحدة .
عن نفسي بعد الحرب ح افتش لي قطعتين ارض ، واحدة في سنجة و التانية في الجنينة .
مشتركة فوق و كل أجزائه لنا وطن
انتو شربتو اجمل قهوة وين ؟
نزار العقيلي
مصدر الخبر
