هل قوى الحرية والتغيير وناشطيها عارفين خطورة البيعملوا فيهو ده
من باب الوناسه وكده !! هل حيجي يوم ونشوف فيهو منصه ومكرفون ولافته خلفيه مكتوب فيها ندوة سياسيه لقوى الحريه والتغير وأما اللافته مقاعٍد فيها خالد سلك وشريف وياسر وود الفكي ومريم وجعفر وباقي ( الحٍملان ) ولا الموضوع ده كيف ياجماعه!!
هل قوى الحريه والتغير وناشطيها عارفين خطورة البيعملوا فيهو ده بترسيخهم لفكرة إنو الجيش ده جيش كيزان وإنو البيقاتل في حميدتي ده على كرتي وإنو القاعد يطلّع الناس تظاهره ده علي كرتي وإنو البيقاتلوا في الدعم السريع ديل كيزان وفلول هل هُم مُدركين لخطورة التنميط ده وعارفين مابعده حيكون في شنو ولا ماعارفين !!
حقيقه كده القوى السياسية دي مع إنها أصلاً كانت في الرمق الآخير قبل الحرب وبالبتعمل فيهو الآن بعد الحرب ده كوم تاني حينقلها من مرحله الرمق الأخير الي مرحلة الموت السريع لأنها تلقى مقاومه من الشعب وفي أي مكان بي طريقه هي زات نفسها حتستغرب فيها !! وكل ده بسبب الضعف وعدم المواجهه للحقائق الأصعب في تاريخ الشعب السوداني منذ الإستقلال والله أنا حزينه إنو يكون في فصائل سياسيه كانت مؤثرة في يوم من الايام وتفقد حتى أدنى مقومات البقاء السياسي لأنها إختارت الطريق الغلط !!
قوى الحريه والتغير المركزي وناشطيها كان ممكن يكونوا محايدين بذكاء سياسي أعلى من كده كان ممكن تحيٍد عن أي طرف عدا الشعب السوداني لكن هي إختارت إنها تحيد وفي نفس الوقت سكتت عن الضرر القاعد يصيب المواطنين العُزل وماقدرت تقيف معاهم وإتخذت طريق حبيث في تلوين الحقائق ومحاولة إخفاءها بإختيار ألفاظ معينه في وصف إنتهاكات المليشيا في كل شيء!!
تبيان توفيق
مصدر الخبر
