العيكورة يكتب.. سعادة الفريق (طباخ) ….!

صبري محمد علي (العيكورة)

(حكاية عجيبة لكن ….) أورد موقع (فيوتشر ٢١) بتاريخ ٢٩/ اكتوبر الجاري ونقلاً عن [الانتباهة] الصادرة بتاريخ ٣٠ اكتوبر ايضاً عن السيد/ صديق آدم احمد سليمان عضو الجبهة الثورية التحالف السوداني وقائد حركة جبهة الهامش للتغيير .

مطالبته بمراجعة اتفاقية سلام (جوبا) من حيث الفكرة والتنفيذ (ده كلام سمح مافى شك) و(قال ليك) إن الترتيبات الامنية جلبت عدداً من المساوئ والغرائب وقال انه يجب معالجة جذور المشكلة على الواقع لا الاكتفاء بالورق مؤكداً ان (الترتيبات) الامنية هى أسوأ ما تم التوصل اليه داخل بنود الاتفاقية متهماً بعض الحركات الموقعة بتجنيد معتادي الاجرام والمتفلتين .

وذكر ايضاً ان هناك من حصلوا على رتب عسكرية عليا دون ادنى تأهيل لذلك

وقال صديق مدللاً على قوله وارجو ان تركز معاي كويس فى الكلام التالي (ده) عزيزي القارئ ….

فصديق قال …

وسانقل هذه الجزئية نصاً حسب (سودان فيوتشر ٢١) قال (ولدنا) صديق (ركز معاي يا عب باسط)

جاهز يا اسطى …؟

كان هناك طباخ يعمل معنا فى مطعم بمنطقة (راجا) . تفاجأنا به قبل ايام بانه اصبح برتبة (فريق) واصبح قائداً لحركة معروفة (دون ان يسمها) .

انتهى كلام ولدنا صديق بهذه الحقيقة الصادمة والمؤسفة

(آآي ياخ ما تعاين لي) !

الغريب شنو ؟ مش فى فريق طبيب وفريق مهندس فريق طيار وكده؟ (اها) المانع شنو يكون هناك (فريق طباخ) عندك مانع؟

عشنا وشفنا ….

وعااادى يا سيدي فى ظل اتفاقية كوارث (جوبا) باكر ممكن تسمع الكثير .

يا جماعة ده ما كلامنا نحنا ده كلام واحد من موقعي اتفاقية سلام جوبا… ولن تستغرب اذا علمت ان من شروط ان تصبح ضابطاً يحق لك الدمج والاندماج ونيل شرف التحية العسكرية (حاجتين بس) !

(حا) تقول لى (شنهن) يا استاذ صاح؟

ان تجيد القراءة والكتابة وان لا تكون قد ادنت فى قضية خيانة الشرف والامانة ! غير كده الابواب فاااتحة امام كل متمرد ان يجلس على على كرسى عسكري متى شاء !

( مااا ياها دى جوبا ياجماعة) مستغربين ليه

حقيقة …..

احيي (ولدنا) القائد صديق على هذا الصدق والوضوح واتمنى ان يتبنى الدعوة لمراجعة هذه الاتفاقية المجحفة والمعيبة والغربية كما ذكر . واعتقد طالما ان من بين موقعيها من هم بمثل هذا الفهم المتقدم فحتماً ستنقح وتعالج يوماً ما . او قد تمضي الى مزبلة التاريخ كأحد مراحيم (القحاطة) والدوام لله .

قبل ما انسى :-

بالله قلت لى كيف يا ولدنا صديق … !

الفريق طلع (طباخ) ؟

صحيفة الانتباهة