🔴 رحلة في معتقلات الدعم السريع – النيلين

عاصمة بدون مساحيق
👈 الحلقة 1
رحلة في معتقلات الدعم السريع
حوار: مؤمن
جلس الخال (م) بابتسامته المعهودة بعد أن صافحناه مهنئين بالعودة سالماً ، ونحن ننتظر بلهفة تفاصيل مغامرته الغير مأمونة بذهابه الى الخرطوم وتحديداً وسط الخرطوم قاصداً (شارع البرلمان) حيث خزانته ومكان عمله الذي به جميع أوراقه الثبوتية هو وابنه وعدد من الناس بحكم عمله كمالك (وكالة سفر وسياحة).
بعد أن جلس طلبنا منه أن يحكي عن الرحلة وشددت عليه أن لايغفل تفصيلاً فأنا أريد أن أكتب عنها وأكون صورة كاملة حديثة حقيقية لشكل (وسط الخرطوم ) الحالي .
وبدأ يسرد لنا تفاصيل الرحلة قائلاً:
بعد صليت الصبح مباشرة يوم الاحد الموافق24.09.2023 الاحد الفات يعني مرقت موقف الحصاحيصا لقيت كمية من الخيارات قمت مشيت على حافلة وجهتها كوبري سوبا .
ركبت وقعدت اعاين في الناس ماشين وجايين وكمسنجية شغالين يكوركو (خرطوم خرطوم) وناس شايلين شنط ومخالي وراجعين.
اتحركت بينا العربية عادي وقطع كبري(رفاعة) ومشينا بي (شارع الشرق) وأنا أهيئ نفسي لاستنشاق هوا الخرطوم ..وماشين عااادي لاوقفنا ارتكاز لا جيش لا شرطة.
لغاية ماوصلنا قرية (الفادنية) وهنا كان أول ارتكاز يلاقينا وللاسف كان ارتكاز (دعم سريع) .
طلع منهم واحد العربية عاين في الناس وبي كل قلة أدب طلب من اي زول يبرز (اثبات شخصية) .
واي زول مامعاه اثبات ينزل ويختفي في غياهب خيامهم وسياراتهم.
استرسل الخال بعد أن تنهد وقال بحسرة : ومن الارتكاز ده تلتي كل 500متر بنلقى ارتكاز دعم سريع.
صمت الجميع متحسرين ..واسترسل الخال بعد أنه تفحص وجوه الحاضرين الواجمة وقال:
كلو ارتكاز بحسب حالتهم النفسية و(قلة ادب) ومشاغلة البنات والنسوان واستفزاز الشباب 🥲.
المهم وبعد وصلنا (كبري سوبا) ومناظر الخراب والدمار واثار القصف والحرائق والعربات المحروقة في كل اتجاه.
المهم في منطقة الكبري لقيت حياة عجيبة (ستات شاي) و(اكل) و(دعامة) منتشرين وباعة متجولين وكمسنجية شغالين (سلمةبقالة) .
(الحاجة الغريبة) اي زول شايل سلاح
ولابسين ملكي مافي زول لاقاني لابس (منتظم) كلهم لابسين (جلاليب ترينغ سوت وتيشرتات وبناطلين وقمصان) ومسلحين. .
الاشياء المعروضة أكل وشراب واجهزة
والمنطقة عبارة عن تجمع وسوق للدعامة.
مشيت وانا وجهتي (شارع البرلمان) في (السوق الافرنجي) محل (وكالة السفر) وبخطط اصلها كيف المهم ركبت مواصلات (السلمة البقالة) وطبعا (كبري سوبا) مغلق وممنوع عبوره بأمر الدعم السريع
فالعربية اتحركت بي شرق النيل لغاية وصلنا 13 وطلعنا بي كبري المنشية .
وطبعا طول الطريق المشاهدات : يمين وشمال ماف مواطنين في عربات مقلوبة ولا محروقة او عربات سايقنها دعامة ومعظمها عربات ملكية . ومركباتهم القتالية(التاتشرات) بسيطة جدا جدا جدا .
قطعنا كبري المنشية ونزلنا ومشى جنوب على شارع الستين وكان الزمن حوالي 1ض..اي ارتكاز بيلقانا دعم سريع لابسين ملكي بيتاكدو من الاثبات ويقلو ادبهم على زول ولايسوقو زول وينزلوهو..والعربية تتحرك
البلد عبارة عن (خلا) مافي محلات تجارية فاتحة طول الطريق ..دمار ..بيوت مكسرة..محروقة ..سواد دمار خراب ..محلات مكسورة محروقة..
شوارع فاضية لما مخيفة ومافيها غير عربات الدعامة مواترهم ..ولاحتى مواطنين .
طول الشارع ممكن تلقى مواطن ولا اتنين ومعظمهم داخلين على الاحياء جوة اتبضعو رغيف وخشو رجعو الحي بما انو معظم الأسر البسيطة القاعدة بيتحاشو يحتكو بالدعامة.
والافران لو الشارع الرئيسي الشي الوحيد البيجيبوهو من هناك فا هو الرغيف.
المهم
وصلنا ..تقاطع المركزي..مع افريقيا
والمكان هنا حاجة عجيبة ..سوق كبير لستات الشاي والاكل والبضائع )والبيبيعو دعامة والبيشترو دعامة )..بتلقاهو فارش بضاعة وسلاحو جنبو .
الا ستات الاكل
حتى الارتكاز الفي المنطقة دي مابيسال المواصلات منتشرين يشربو وياكلو وعايشين حياتهم عادي.
(مشهد مكرر) اثار دمار خراب حرائق قديمة سيارات محروقة ..وهكذا.
المهم لقيت مواصلات ماشة (ابو حمامة) قلت دي بتقرب لي المسافة والباقي بتمو مشي .
ركبت المواصلات واتحركنا ومرينا بالصحافة (والحال محزن) شوارع فاضية اثار دمار وبيوت مفتوحة وريحة الموت والخوف وعربات (ملكية) يستقلها الدعامة . وارتكازات دعامة
طول منطقة الصحافات ومرورا بالديم وحتى ابوحمامة .
وابو حمامة كانت محطة العربية الأخيرة ونزلت هناك واتجهت غربا ماشي على باشدار وفي راسي اني امشي بي شارع زلط مرورا بالغالي وحتى وسط الخرطوم.
بعد مشيت أقل من 100متر وقفني دعامي لابس عادي ومسلح قال لي ياعمي سوق الديم وين؟
قمت وصفت ليهو.
وواصلت وفجأة سمعت صوت بينادي بي قوة يازول يازول
اتلفت لي مصدر الصوت وكانت المفاجأة.
الحلقة الاولى
(خرطوم بدون مساحيق)
أهمية الشير ..للراجعين بدون تفكير

مؤمن ابوالعزائم