نزار العقيلي: الدعامة 15 ابريل كانت قوتهم 100% وما قدروا يستلمو البلد .. هسة بالركشات والعجلات ممكن يستلمو البلد؟
[ad_1]
مافي حاجة اكتبها .. مافي موضوع يستاهل نكتب عنه و فيهو .. ما بحب ازحم الصفحة بمواضيع انصرافية ما عندها قيمة و وزن .. اكتب و اقول ليكم شنو ؟؟
اقول ليكم انو السياسيين السودانيين ولعو البلد و هربوا خلوها و حايمين من دولة لأخرى و من ملهى ليلي في الليل لي قهوة في الصباح يفكو بيها شغل الليل !!
عايزني ارسل ليكم صور خالد سلك في فنادق كينيا و صور اردول في جنبات الدقي و المقطم و هو بيحكي نكت بايخة لبعض سيدات اعمال شارع الهرم ؟؟
براكم شايفين حنان الما كوزة بتضرب في الاستاكوزا و لابسة الاصفر في الجبل الاحمر و حايمة من سينما لقهوة .. عايزني اكتب ليكم عن شنو ؟؟
عايزني اتكلم عن الموقف العملياتي ؟؟ في ناطق رسمي و في صفحة للجيش و في الف صفحة بتنشر عمليات الجيش .. و كلها عمليات ما فيها جديد و كل عملية بموتو فيها الدعامة موت الصراصير .. عمليات كتموتو ما ينفع نتكلم عنها اساسا .. بالنسبة لي المعركة اتحسمت و انتهت تماما” .. الدعامة ديل يوم ١٥ ابريل كانت قوتهم ١٠٠ ٪ و ما قدروا يستلمو البلد .. هسه بعد مية يوم بي الركشات و العجلات ممكن يستلمو البلد ؟
منتظرين بعد كده عربية النفايات .. القاعدين في البيوت و الشوارع ديل ما الدعامة الحقيقين .. الدعامة الحقيقين انقرضو والله .. الفي شوارعنا ديل ح يلقطوهم ذي ما عربية النفايات بتلقط الزبالة .
الواجعني جدا جدا هو الوضع الإنساني .. حال الناس .. حال العائلات المتعففة .. حال المرضى .. عدم الدواء .. عدم التحاليل .. الناس العايزة ترجع بيوتها و ما لاقية حق البرجعهم و لا حق الاكل .. الناس القاعدة في بيوتها و ما عندهم موية الشراب و حق الفطور .
الواجعني جدا إنو السياسيين هربوا من البلد و تركو الشعب و الجيش ياكلو نارهم .. تركو الشعب تحت القصف و الجيش في الخنادق و قعدوا هم في الفنادق منتظرين اي تسوية تجيبهم عشان يحكموا الشعب و الجيش .
نزار العقيلي
مصدر الخبر
