صبري محمد علي (العيكورة) يكتب: ومن مضحكات وزارة المالية أنها ..

وزارة المالية بتاعت (عمنا) الدكتور جبريل ابراهيم تصدر تعميماً صحفياً
(بحسب الانتباهة) …!
تخيل يا مؤمن …
عندما تسمع ان وزارة المالية تصدر بياناً او تعميماً
عقلك (حا) يمشي وين ؟
أكيد على القروش صاح ؟
او تتعشم خيراً لربما هناك بشارة تخفيض لاسعار بعض السلع او لربما تتجهم فلربما هناك متوالية هندسية من متواليات (الفكي) لزيادة السلخ اليومي والمعاناة .
لكن تعالوا ….
شوفوا التعميم الصحفي بتاع وزارة دكتورنا جبريل قال شنو!
التعميم (ينفي) بالله مد هذه الياء طويلاً وانت تقرأها ..
(قال) …..
ينفي استقالة الناطق الرسمي باسمها السيد احمد الشريف ووصف التعميم الخبر المتداول
بأنه خبر غير صحيح وعار (تمامن) من الصحة . وان (وان كل الحصل) ….
ان السيد الناطق الرسمي طلب اعفاءه عن التكليف وقد تم رفض طلبه !
(ما تعاين لى ياخ ) !
والله ده الحدث الذي بموجبه اصدرت وزارة (جبرين) هذا التعميم !
يا جماعة ….
بالله ده خبر يرقى ان يسمع به الجيران ناهيك ان يصدر كتعميم من وزارة (محترمة)
ياخي …
دى حاجة عادية تسمى ترتيب الوزارة من الداخل اوالبيت من الداخل زيها زى (فريش) اي ملايات .
يا جماعة ….
يعني حاجة بسيطة زى دي واحد قال ليك ….
والله يا سعادة الوزير ضهري بوجعني وما عاوز اشتغل!
فى شنو …
اكتر من تقول ليهو اتوكل على الله والله يسهل عليك ونشكرك على مجهودات السابقة !
فماذا سيضير المواطن السوداني إن كان لوزارة المالية ناطق رسمي او لم يكن؟ اما يكفينا جزاريها؟
وهل حقاً انها وزارة تحتاج
لناطق رسمي ؟
ياخ (ابهل لينا الكشكوش) ده تاني برانا بنتكلم والله نغني غُناء سرور عديل !
يا جماعة ….
شفتو السيد الوزير (حنين) كيف قال لازم يسمعكم صوتو !
والله يا سعادة الوزير
كفانا عمايلك ورغيفك ولحمك وسُكرك .
ياخي مش كفاية علينا …..
كل موسم حصاد نحن فى مشكلة احد طرفيها السيد جبريل؟
دى عاوزة ليها ناطق رسمي؟
ومش كفاية علينا ….
كل اضراب ومطالب عمالية او نقابية كان احد طرفيها (المستر) جبريل !
يا سيدي …..
لا نحتاج لناطق باسمكم فقط فعلوا لنا نصف الوزارة المعطل
( …..و التخطيط الاقتصادي) !
اين هو ؟
سيدي جبريل ….
ومنذ ان تسنمتم ذروة هذه الوزارة
كم ميزانية اعددتها وخرجت بها للناس ؟ قل لي بربك
جمعكم احتفال قبل ايام بشركة الموارد المعدنية بوزير الطاقة او النفط (اظنه) ومدير الشركة فثلاثتكم لم تذكروا لنا (كم) بلغ انتاج السودان من الذهب للعام المنصرم الذى كانت الاحتفائية بخصوصه ! فكل ما تكرمتم به هو جملتكم المضحكة التى
ما (معناها) …
ان الذهب يساهم بقدر كبير او مقدر فى دعم الاقتصاد او الصادرات ! على ما اذكر
(بس كده)؟
كلام إنشائي بوزارة الارقام والفواصل العشرية!
أهكذا يا وزير المالية تتحول الارقام فى عهدكم الى كلمات
(كثيراً وكبيراً و واسعاً) وغيرها ؟
اما حق لنا …
ان نعيد على مسامعكم السؤال مرة اخرى …
كم انتج او كم (باع) السودان من الذهب العام ٢٠٢٢م ؟
قبل ما انسى :
نبارك للسيد الناطق الرسمي لوزارة المالية السيد احمد الشريف تشبث وزارة جبريل به
وياخي …
حد يشعر بالسعادة
ويمشي يختار البعاد !
(ولو عصرو عليك تاني كلم لي جبريل ورقي جاهز ..!)

صحيفة الانتباهة