صبري محمد علي (العيكورة) يكتب: المهنية (اتعلموها) من والي الجزيرة أيها الناس …!
حقيقة لم ولن اخف اعجابي وتقديري واحترامي لاداء ومهنية والي ولايتنا الحبيبة (الجزيرة) السيد اسماعيل عوض الله العاقب متعه الله بالصحة والعافية ومن اى الزوايا نظرت لهذا الرجل . سرعة الحركة المواقعية واتخاذ القرار الصائب بعيداً عن عبارة (ينظر ويفاد) والامثلة كثيرة التى تغنى بها غيرى عن شخصية هذا الرجل.
يعني الزول ده باختصار كده
(يا يوسف) !
(قيافة وفايت الناس مسافة)
واكثر حاجة مكيفاني خااالس انه يمارس حياته العملية ولا ينسى نصيبه من العطلات واظنها (الفسح) كمان . هذا الرجل رصدت له تقريباً ثلاث مرات اصدار مرسوم ولائي يفوض فيها امين عام حكومة الولاية بتسيير المهام من الفترة كذا الى كذا اى فترة اجازته من غير ان يذكر انه فى عطلة او راحة .
محتوى مدفوع
رونالدو يوجه رسالة لجماهير النصر السعودي
يعنى يا جماعة …
من اليوم الفلاني الى اليوم الفلاني انا ما موجود يا جماعة والمسؤول منكم هو زميلنا امين الحكومة .
يا اخوانا بالله فى حلاوة ومهنية وعطاء اكثر من كده؟
واخرها كان مرسومة الخميس قبل الماضي والذى يفهم منه غيابه لاسبوع نعم اسبوع فقط ولكنه اصدره ..
(حقيقة … لقد اتعبت من سيأتي بعدك يا اسماعيل)
(طيب) عاوز اقول ليكم مفارقة غريبة جداً وهى ….
ان السيد نائب رئيس مجلس السيادة الفريق (الما ركن) حميدتي قال ضمن اجابته على سؤال صحفي ابان زيارته الاخيرة لدولة جنوب السودان
قال ….
ان السيد الرئيس ويقصد به الفريق الركن الاول البرهان فى اجازة ! واخدنا منه الاذن لهذه الزيارة وسمح ! واسترسل فى استكمال اجابته التى لا يهمنا مضمونها بقدر ما يهمنا منها ان ….
(السيد الرئيس فى اجازة) !
فى زول سمع بيها يا جماعة ؟
هل اعلنها القصر ؟
(قال ليك) يطرشنا
قالوا لينا رئيسكم مسافر او غائب او (ساااي) زهج منكم وعاوز يرتاح من خلقنا دي؟
لا والله !
طيب داخلية واللا خارجية نقول (حبيبي سافر وجاء) ؟
أبداً ….
علمي علمك واحد
ياااا جماعة …
البلد دى (طبلية سجاير) ؟
تحرسها لجارك وتفوت سااااكت كده؟
لا بيان لا اعلان لا تكليف !
والحق يقال ليس السيد البرهان وحده من يفعل ذلك
فكل الذين سبقوه من حكام السودان لم نسمع لاحد منهم انه تمتع باجازة سنوية واعلنها ثم كلف من ينوب عنه للقيام بمهامه !
والحمد لله امورنا ما زالت ماشة بالبركة!
(ما عارف الحكاية دي شايفنها عيب واللا شنو يا عب باسط)
ياخ ضهري اوجعني من كثرة (الصنقير) وعاوز ارتاح
فيها حاجة ؟
نقلت مقولة عن الراحل الرئيس نميري انه كان يحضر صباحاً ويضع (الكاب) على مكتبة كاثبات على انه موجود ثم ينصرف لقضاء مهام اخرى لربما اجتماعية !
والبلد كانت ماشة (زي الساعة)
(طيب) العبد لله (حا) يتبرع بتحليل سبب عدم اعلان تكليف البرهان لمن سيقوم بمهامه (هذا بالطبع عطفاً على ما صرح به السيد النائب .
طبعاً هو اكيد قد يكون كلف من يقوم بمهامه و لكن لم يتم اعلانه؟
وقبل ما تقول لي (قول قول يا استاذ)
اسمعني كويييس …
الشي الطبيعي حسب مخي(الطحينة ده) …
ان اعلى سلطة فى البلد عندما يغيب لاى سبب سيكلف نائبه للقيام بمهامه اثناء فترة غيابه
او انه …(اااي نعم ممكن يكلمه) فى قعدة شاهي او بالتلفون وكده وخلاس دون اعلان .
لاعتبارات حساسة جداً جداً يقدرها هو قد لا يعلمها حتى اقرب خلصائه .
ويقول ليهو …
(يا نائبي) فلان بالله خلي بالك من البلد ويشتت بلا مراسيم ولا اعلان و لا دوشة
لكن ..(خلي بالك فى الحتة دي)
و هي ….
وهو (طالع) من الحلة
(فهمتا علي) ممكن جداً ….
يعمل حاجة تانية وهي ..
يمر على التاجر (حاج عثمان) الرجل الراااسي والحكيم والغنيااان يوصيهو الوصية الكاملة على العيال واغراضهم والمدارس والسعية و (حق) الراعي وحليب البقرة والجزار وكده ويتخارج .
فهمتو الحكاية …!
انا غايتو (متوقع) ان السيد البرهان عمل كده قبل اجازته
لكن (منو) حاج عثمان بتاعو فهذا ما سأتركه لفطنة القارئ .
قبل ما انسى : –
مقدرين الظرف يا ريس تمشي وتجي بالسلامة يا (فندوم)
ولو كنت محلك لفعلت الذي فعلت !
وقديماً قيل التدبير نصف المعيشة او نصف الحكم فالامر سيان .
صحيفة الانتباهة
مصدر الخبر
