شاب سوداني يلجأ لجمهور مواقع التواصل لحل مشكلته: والدي يريد الزواج من “نسيبتي” أم زوجتي الأرملة وطلب مني أن أفاتحها في الأمر.. المشكلة أن أمي صعبة وقاهرة زي شيخ الغفر فماذا أفعل؟

نشر شاب سوداني استشارة لها على إحدى الصفحات المهتمة بنشر الاستشارات العاطفية والخاصة بغرض مناقشتها بين المتابعين.

وبحسب رصد ومتابعة محررة موقع النيلين فقد قال الشاب في استشارته التي نشرها على الصفحة التي تنشط على موقع التواصل الاجتماعي فيسبوك:

اقسم بالله اقول الحق ولا شئ غيره شوروني بدون تريقة ولا تنمر ابوي داير يعرس نسيبتي!! اول مرة اشوف اب بطلب من ولدو يعرس ليهو!! النصيحة ابوي ختاني في حته ضيقه شديد.. بحكي ليكم وانتو احكمو… كل الحصل نسيبتي جات للوضوع زوجتي، ونسيبتي صغيرة.. اتزوجت واترملت بدري عندها بنتين لكن زوله ماشاءالله النوع المحافظ، بعدين مقدره قادر الله..النوع الهميم بتقوم بدري.

وتابع: منظمة اي حاجة بمواعيد، بعدين طباخه مبالغه…ابوي من شاف نسيبتي مسكتو امهل هله!!! وعمل الدرب ساساق بقى يرجف عينك يا تاجر، والله زمان ابوي ما كان بجيبني!! هسي بقى كل اليوم صباح ومساء ذي دواء الملاريا… وظرافه وخفت دم،وطقيم مع نظارة.. حتى زوجتي لاحظت حركات ابوي قالت لي ابوك عملا ظاهره!! قولت ليها نصبر لحدي الاربعين، الحمدلله الاربعين تمة بخيره وشرها، ونسيبتي قالت ماشه بيتها، قالت اعفو لي، طوالي ابوي مسك الموضوع حلف عليها ماتمشي!! الزول لو قعد للحول ما يقوم بخاطر زول نحن لسه ما شبعنا منكم!! بمناسبة مع انو مافي اي مناسبة..ماشاءالله ولدي ناسب لكن وانا قلت ليه ابقى عشرة علي زوجتك..واهل زوجتك، المهم ابوي بقي راقد رز اخر حاجة!!.

وأضاف بحسب ما نقلت عنه محررة موقع النيلين: يوم بالمساء ابوي دخل علي بدخله بتاعت زول معلم قديم، تخيل المشهد ابوي قال لي ياولدي ولدك لو كبر خاوي، وانا داير اكون ذي اخوك، وداير اتزوج نسيبتك!! والله امك مافيها عيب.. والراجل محللات ليهو اربعه، وانت عارف ابوك زول شغال ودغري ملتزم، بقدر اصرف بيتين وانا داير تاخد راي نسيبتك والفيها خير تبقي!! والله انا من طريقة كلام ابوي داير اموت من الضحك اول مره ابوي يكون جادي كدا قلت خير.. المشكلة امي زوله صعبة قرن شطة البيت كلو بخاف من امي وهي قاهرة ذي شيخ الغفر.

وختم الشاب استشارته التي أضحكت الجميع: ابوي بلاوذ من أمي شديد، دا كوم،وبتكره زوجتي دا كوم تاني، لو عرفت بتعمل مليونية في البيت!!! وانا ساكن في نفس البيت إلا ارحل.. المشكلة التانية انا بحترم نسيبتي ما عارف اقول الكلام كيف وابوي بقى ذي البوري المعلق عملت شنو.. عملت شنو؟لا قادر ارد علي ابوي ولا قادر اكلم نسيبتي!! ابوي دخلني في فتيل شورو علي يا ناس العيادة اعمل شنو اقيف مع ابوي ولا مع امي.

رندا الخفجي _ الخرطوم

النيلين