صبري محمد علي (العيكورة)
الاسبوع المنصرم هذا يمكن اعتباره اسبوع التحانيس بلا منازع والتحنيس او التحنيك هما لفظان لمعنى واحد وهو الاسترضاء . فكما ان الكلمة اللاتينية (اولوجي) تعني علم
ما تعاين لى ….
وتقول لي جبتها من وين ؟
حفظونا ليها كده
وهذه (الاولوجي) يستدل بها على مسمى (العلم الفلاني) مثل زولوجي وفيسيولوجي وهستولوجي وهكذا فهناك ايضاً علم
(التحانيس ولوجي) وهو علم قديم ومحترم عرفته البشرية ونجح فى اخماد كثير من الصراعات ورأب الصدع وقد يكون ايضاً (فاتحة خير) للتوفيق بين رأسين فى الحلال . او اتمام صفقة تجارية واشطر من يؤديها حبايبنا السماسرة ولو انهم غالباً (بدوها كوز موية)
هذا العلم هو الذى شغل حيزاً كبيراً من الساحة السياسية الاسابيع الماضية
(فاااا) مثلاً …
عندما تباين القحطان المركزي والديمقراطية خالس رشح فى الاخبار ان الفريق البرهان عمل بينهم عملية (تحانيسولوجي) وطبعاً لم تذكر هكذا ولكن قيل انه يقود (وساطة) !
مش ياهو التحنيس يا عب باسط ؟
طيب …
دورت الايام و(حدث ما حدث) وشاع ما شاع عن حكاية الدمج والدعم الزعل الحصل
فاا …
قامت قحت المركزي (ايضن) بعملية (تحانيسولوجي) بين المكونين العسكريين
قالوا شنو ؟ وصلوا لى شنو ؟ قفلوا الباب فى وشهم
ما تسألني المهم خلينا فى موضوع التحانيس بتاعنا ده
طيب …
تحنيس آخر قيل ان (المستر) فولكر قام به الايام الماضية اظنه ليلاً …
غردت به الاستاذة سهير عبد الرحيم فى قولها
ان فولكر ذهب يحنس البرهان
وقال ليهو (الزول ده ما تضغطوا عليهو) والبرهان قال له ليس هناك مشكلة شخصية معاهو .
الزول ده منو؟
والله هديييك سهير امشوا اسألوها .
طيب ….
فى حاجات كده تصلح ان
نفهمها (شمار) وما هى بشمار
تحنيسة؟ لا ما تحنيسة
لكن هى بالضبط كده اقرب الى (كبر اللفة) او (النطة) وهو الرجوع عن رأي سابق
(فاااا) …
هذا الاسبوع برع فيها حزب الامة بامتياز
قول لي كيفن ؟
اقول ليك انا يا صاحبي
احد قياديي الحزب قال ان الحزب لم يكن مهندس الاطاري ولكن قال ان اصحاب القرار استخدموا اسمنا للاستقواء بنا
لاحظ حتى الان انا ما قلت قاصد البرير و لا قحت المركزي ولا حاجة !
تاني برضو …
نقلت الاخبار عن السيدة مريم الصادق انهم لن يوقعوا على (الرذيلتين) وهما الإغراق والاقصاء !
(اهااا) يا دكتورة قمنا على الكلام الملولو ؟
الإغراق ده ما ياهو كلام ناس قحت المركزي .
والاقصاء ده مااا كلام الارادلة والجبابريلية !
(مش كده يا جماعة) ؟
(فااا) …
الفاهم حزب الامة مع منو بالساحة السياسية فليقل لى وله الاجر .
قبل ما انسى …
العندو شمار واللا اى حاجة ما (ياها) يا جماعة يطلعها لينا قبل رمضان
امس عمنا (اسحق) قال ليكم الخال ما راجع كلو كلو !
صحيفة الانتباهة
مصدر الخبر
