صبري محمد علي (العيكورة)
[المضايرا] اصطلاحاً لدى اهل السودان تعني (اجّل) الموضوع ده شوية او زحو من وشي وحا نرجع ليهو مرة تانية .اقول ليك الكلام ده بصيغة اخرى يا (عب باسط) ….
مثلاً يكون فى ضيفان بصدد زيارتكم فى البيت فامك واخواتك حا يعملن نوع من (المضايرا) لكل حاجة (شينة) او ما مشرفة وما عاوزين الضيوف يشوفها فيدسوها تحت السرائر او داخل المخزن او حاجة بالشكل ده يعنى هى قريبة من حكاية (الشينة منكورة) لكن كمان ما لدرجة تودوها الكوشة بتنفعنا بعد الضيوف يمشوا وخااااصة الحلل القدام والجرادل المطرقعة ! فالحركة دى بسموها نوع من المضايرا …
برضو الجماعة البتاجروا فى الممنوعات لمن يشمو ليهم ريحة (كشة كده) بيعملوا نوع من (المضايرا) . وحتى البائعين المتجولين لو شعروا بحاجة كده وللا كده من السلطات المحلية بعملوا نوع من (مضايرا آكشن) الى ان تمر العاصفة .
اظن بعد كده عزيزي القارئ بقيت جاهز لفهم الكلام العاوز اقوله وهو ….
حكاية (المضايرا) البعملوا فيها فريقينا الركن (البرهان) و (الما ركن) حميدتي من جهة وناس اربعة طويلة من جهة اخرى لا يمكن ان تستمر (بوشها) كده الى ما لا نهاية يعني بمعنى آخر …
يا جماعة فى تسوية ثنائية ؟
عمنا البرهان (يقول ليك) اصصصلا كلام زى ده ما حاصل
الفريق حميدتي يقول ليك نؤيدها وسنطلع عليها ! العم (فولكر) يقول ليك الاتفاق ده على نهاياته ومتبقى على اعلانه ! يعصروا بمظاهرة مظاهرتين يقول ليك لا والله يا جماعة مافى كلام زى ده والقرار بيد السودانيين وما نحن الا (شربة خروع) ! ناس اربعة طويلة ماسكين العصاية من النص ناس يؤيدوا وناس يطلعوا ليك لجان المقاومة تعارض ! ناس الامة والاتحادي كراع بره وكراع جوة .
ناس القطاع الوطني العريض جماعة ود بدر ومن ايدهم قالوا ليك (علي الطلاق) جثثنا إن هم طبقوا هذا الدستور اللقيط !
اهاا …..
فى ظل هذا التوهان (كترت) المضايرا يا جماعة نتوكل على الله نعلنها واللا الحكاية دى بتولع البلد نصبر شوية .
الصين بالامس عبر سفيرها بالخرطوم بحسب [الانتباهة] على ما اعتقد قالت سنستخدم حق النقض (الفيتو) لصالح السودانيين ان اراد العالم (الما حر) تسويق مسودة دستور المحامين عبر مجلس الامن او الامم المتحدة وتزوير الارادة الوطنية !
فيبدو …
ان مسودة دستور لجنة المحامين الذى يتبناه (فولكر) واربعة طويلة ومن يقف خلفهما قد اصبح (زى) الجنية السوداني ! لن يوكل عيش عبر اي من منابر الامم المتحدة بعد تصريحات الصين الاخيرة واعتقد ان روسيا ستدعم ذات التوجه الصيني اذا ….
على فولكر والقحاتة تجهيز (الكورة) يبلوه ويشربوا مويتو . واعتقد بعد عودة اللجنة الشرعية لنقابة المحامين ستكتمل مراسم الدفن قريباً وبكل اللغات .
قبل ما انسى :-
البرهان يا اخوي (المضايرا) البتسوي فيها دى حدها وين ؟
غتست حجر البلد ياخ ! قمة الجزائر وانتهت اهاا ننتظر قمة المناخ فى شرم الشيخ واللا الراي شنو ؟ قول حاجة ياخ .. !
صحيفة الانتباهة
مصدر الخبر
