[ad_1]
صبري محمد علي (العيكورة)
بالامس وبحسب [متاريس] ذكرت ان (ولدنا) الباشمهندس خالد سلك المتحدث (الرسمي) واضيف لها من عندي (جداً) باسم العملية السياسية (طبعاً المقصود ياهوو الإطاري مقطوع الطاري ده)
قال لفعالية دون ان نسميها
إن دولة جنوب السودان لم ترسل لهم ردها على (الإطاري) بخصوص المشاركة ضمن ورشة تقييم اتفاق (سلام جوبا) !
و سلك قال …
(ابلغناااا) . خلي بالك والجمع هنا للتضخيم ابلغنا مصر نحن القحاطة ان دعوتها (غير بناءة) وهى تأسيس لعملية مسار جديد (لن يكتب له النجاح) !
آآي والله قال كده !
(لا) وكمان قال ليك . ركز معاي فى الكلام الجايي ده
انهم اى (ناس الاطاري)
تلقوا دعوة لاجتماع القاهرة إلا أنهم ابلغوا مصر (عدم رغبتهم لجعل السودان ساحة لصراع إقليمي) ….!
يا سلاااام …. ياخ شفتو بيع الكلام ساهل كيف؟ شفتو المكنة دي كيف؟
يا هندسة ؟
أأنتم من تتحدثون عن الصراع الاقليمي ولم تتركوا نطيحة ولا متردية و لا موقوذة ولا مرتزق إلا وقد اتيتم بهم الى السودان ؟
انتم من تتحدثون عن الصراع الاقليمي وقد (حفت) ارجلكم جيئة وذهاباً تطرقون ابواب السفارات ليل نهار تلتمسون البركة والدعم والدولار الاخضر!
(لغاية هنا انا ما جبت سيرة للثمانمائة الف دولار ) بتاعت الورش !
يا خالد ….
أأنتم من تتحدثون عن الصراع الاقليمي و قد اصبحتم ملطشة ومحل تندر وسخرية امام موظفي استقبال مكاتب السفراء تتزلفون الدول ايسمح لكم بالدخول ام لا .
يا ولدنا … يا ولدنا
تانى كلام زي ده اصصلوا ما تقولوا فالشعب كله قد اكتشف حقيقتكم إلا انتم ما زلتم تسبحون فى بحور من التغييب
الذ حاجة …..
ان اتفاقية سلام جوبا التى يتداعون لمناقشتها (ولااااا) قحاطي واحد له توقيع عليها إلا اللهم إن كانوا يقصدون المسارات المصنوعة !
وكسلا (حالة) يا عمك
وجاييك فى الكلام اصبر لي ….
اطراف الاتفاق ال (١٣) بمن فيهم (الخال) عن حكومة السودان وشهوده الخمسة بمن فيهم البرهان . وضامنوه الثلاثة بمن فيهم الراحل إدريس ديبي ليس من بينهم (صفة) او مسمى او (ريحة) لقحت المركزي .
إلا إن كنتم (لابسين) طاقية الاختفاء ! فحقو تعلنوها للناس عشان (ندق الطش) كويس .
اذاً لماذا قحت المركزي مهمومة بمناقشة او تقييم اتفاق سلام (جوبا) لهذه الدرجة وهى ليست طرفاً فيه أساساً؟
اقول ليك انا ….
القحاطة شعروا ان اجتماع القاهرة هو ما سيرجح بكفة السياسة السودانية لذا (آآخر كرت) لهم هو إشعال البلد بالوقيعة بين اطرافه والمعارضين له وتروح (شرم الشيخ) شمار فى مرقة !
وإلا فقل لى بربك هل الوقت يجب ان يكون للتوافق حول حكومة ام لاتفاق سلام او غيره
لذا (برأيي) حسناً فعل مناوي وجبريل وغيرهما بالابتعاد عن هذا الفخ الخبيث
قبل ما انسى : –
نعم الاتفاق يحتاج لمراجعة وتقويم وتقييم ولكن ليس بهذه الطريقة الاستفزازية وليس فى
هذا التوقيت الحرج الذي يمر به السودان .
وباختصار كده الايامات دي (الجو جو فول)
صحيفة الانتباهة
مصدر الخبر
